شعر ترکی نه گوزل اولار

نه گوزل اولار

یولداشلار یولداشین یامان گونونده

دادینه چاتالار نه گوزل اولار

غم غصّه باساندا داردا قالاندا

دردینی قانالار نه گوزل اولار

اورک لر شاد اولا غم لر غصّه لر

اوت توتوب یانالار نه گوزل اولار

عشق اولا درک ائده انسان انسانی

غصّه لر آزالار نه گوزل اولار

عدالت مروّت غیرت بو یئرده

سولار تک آخالار نه گوزل اولار

حسدین کینه نین هامی اورکدن

ریشه سین قازالار نه گوزل اولار

خیانت قورتولا جهالت اُوله

حق یولون آچالار نه گوزل اولار

هر یئره باخیسان جنگ و جدل دور

قورتولا داوالار نه گوزل اولار

ستمگر ظالملر ظولمین خیالین

باشلاردان آتالار نه گوزل اولار

انسانلار عالمده صلح و سازشین

لذّتین دادالار نه گوزل اولار

صلح اولا جهاندا اِللر هامیسی

باش باشا چاتالار نه گوزل اولار

اولارکی سئومیری صلحی، سازشی

توپراقا باتالار نه گوزل اولار

بو ظلمت گئجه ده جوانلاریمیز

دوز یولی تاپالار نه گوزل اولار

الله ها قرآنا هامی بنده لر

معرفت تاپالار نه گوزل اولار

اُمّتون آتاسی علی دور علی (ع)

سوزونه باخالار نه گوزل اولار

یارالار یئر سالیب اورکده فانی

دوزله یارالار نه گوزل اولار

فانی تبریزی